رحمة الوالدين هي البديل الموضوعي والمُريح لوالديك بعد عجزك عن انصافهم مادياً..

للعِبرة .... عدد كببر من الطلبة والطالبات الملتحقين بالجامعة موسم 2009 /2010 والمنحدين من اقليم تارودانت تحرموا من المنحة الجامعية، وأغلبهم ينحدر من أسر فقيرة وفيهم لي يتيّم الأب ما كاين لي يقوم بالسهر على توفير بعض الاحتياحات الضرورية ديالو لاتمام دراسته الجامعية .. كنت ذيك السنة مُناضل في صفوف فصيل يساري منضوي تحت النقابة الطلابية أوطم ومن خلاله كنا كندافعوا على الطلبة من أي مُحاولة لضرب المكتسبات والاجهاز على الحقوق. وبما أن ولاد البلاد كيشوفوني بطل من داخل الحلقيات وواحد الطالب هواري كيعرف يناقش ويدافع عالى أفكاره ومواقفه، جاو عندي شي طلبة وطالبات عاد التحقوا بالجامعة وما خرجاتش ليهم المنحة - وبحكم الانحدار من نفس المنطقة - كانوا مرتاحين في طرح المشكل العويّص لي كان يجثّم على أفكارهم ويؤرق نومهم، لما يشكله مبلغ المنحة الهزيل من دعامات مالية لداك الشوية ديال الفلوس لي كيصيفطوه ليهم مالين الدار لي كان يا الله يقدر يكفيهم في طبع المحاضرات وشراء المطبوعات .. كلت ليهم يكون خير، وكتبت إعلان عبارة عن نداء موجّه للطلبة المنحدرين من هوارة الالتحاق بالجمع العام الذي سيعقد بمدخل الكلية نهار الفلان الفلاني قصد تدارس مشكلتي النقل الجامعي والمنحة، وبدينا نعلقوه بأرجاء ودهاليز الكلية من الدخّلة تا لسّبورات كتابة الشعب المُدَّرسة بالكلية .. ونهار المعلوم جاو الطلبة والطالبات غير الممّنوحين .. ومنهم لي جا وخا ممّنوح .. وجاو طلبة كان عندهم العام الثاني أو الثالث في واحدة من الكليات التابعة للجامعة كدعم للطلبة الجدد، وتقرر نديرو وقفة قدام العمالة من بعد ما خلص الاجتماع لهاد الخطوة بعد ما باءت المساعي لحلول ودية مع الجهات المسؤولة بالفشل .. درنا واحد الصباح ومشينا وكان العدد مُحترم جبر الكاتب العام ينزل ويطلب لجنة للحوار ثم انتخابها بسرعة ودخلت عند مع 12 ديال النهار وما خرجت تا للخمسة، ومن بين الملف المطلبي لي كان مسطر خرجوا باتفاق على الاستجابة لبعض المطالب أهمها ( تسوية ملف غير الممّنوحين ودراسة مشكل النقل مع الشركة المكلفة بتدبير هاذ القطاع بالمنطقة)، وكلها رجع فحالو عيان ومتعب لأن النهار كامل كنا واقفين قدام باب العمالة .. داز أيام وأيام تقريبا شي ثلاثة الشهور ( دمج المنحة الأولى مع الثانية للطلبة لي تسوات ليهم الوضعية بعد الوقفة الاحتجاجية) وكنت أنا نسيت الوجوه والأسماء والملامح، وواحد الصباح كنت كالس فالرِّواق التابع للفصيل لي كنت / ولازلت واحدا من المتبنين لأفكاره، تا كنتفاجأ بواحد البنت معاها مرأة كبيرة وقفوا حدايا وفإيديهم خنشة ديال الميكة .. سمعت البنت تكول لمّها هو هذا أمّي .. كنت زلال وقتها وخفت نكون قودت السوايع مع شي وحدة وجابت ليا مّها، تا كنوقف على المرأة العجوز جايا بغات تبوس راسي ... ألواااه الواليدة ياك لباس؟ وقبل ما تمدّ ليا الميكة لي كانت هازة معاها شرحت ليا الواقعة، وأن بفضل ذيك الوقفة الاحتحاجية لي كنا درنا قدام العمالة وهزيت فيها الشعارات المطالبة بإنصاف أبناء الفقراء من الحيّف الذي طال حقهم في الاستفادة من المنحة، بنتها خرجات ليها لابورس .. فاش حكات ليا بأنها أرملة .. والظروف لم تكن ستسمح لها بأن تواكب مصاريف ابنتها الجامعية وذاك التقاعد لي بقا ليها من راتب المرحوم يا الله يحفظ ليها البقاء على قيد الحياة هي وثلاثة الأبناء معاها فالدار، جريت البنت وكلت ليها جوج كلمان فوذنيها: - أنا راه ما كنخلي تا بلاصة فالسلام والداخلة والهدى والقدس والحي المحمدي ولاكوط .. نهار نلقاك تقحبّني غا يكون ليا معك تصرف آخر .. شوفي فوجه أمّك مزيان؟ الميّكة لي كانت هازة العجوز فيها واحد نصّ ايترو زيت العود وقالب السكر وباكية ديال أتاي البلار؛ وواقيلا كالت ليها بنتها راه كيكمي هذا أمّا، جابت واحد باكية كازا مغلّفَة فورقة ديال الجورنال .. حبست الضحكة والبساطة في أبهى تجلياتها واقفة قدامي ودموع الأم حابسهم بزز .. ومن بعد شدّ وجذب والله تا تشد .. لواه ألالة راه ما يمكنش .. شديّت باكية كازا شعلت منها كارو والشيء لاخور كلت ليها ما محتاجوش خليه لبنتك راه غا تحتاج ليه مازال .. نسيت هاذ الواقعة تا لواحد النهار .. ف 2017 كنت سكران كندّور من بار لبار والصّطافيط لي تلقات بيا يكول ليا منها البوليسي لي حدا الشيفور : سير تنعس راه غا تبات عندنا، تا وصلت لواحد البار سميتو بيرات pirate دخلت ليه وخا الفيدورات داروا ليا النقطة التفتيشية فالدخلة، وكي تعاملت معهم باللغة لي كيفهموها أفسحوا الطريق ومعها عبارة : تفضل اسيدي؟ كندور نقلب فين نكلس بعد ما بان ليا كولشي عامر، تا كنحس بواحد الإيد تشدني من القرفادة ديال التريكو لي كنت لابس .. أنا حساب ليا الفيدور تنادم معاه الحال ورجع ينقذ الموقف، تا لقيتو واحد يعرفني .. أفين ؟ أفين .. والله تا تلتحق بينا.. لا خود راحتك .. وجرني عندهم للطبلة .. كان هو وواحد السيد آخر جالسين بوحدهم كيطلبو هينيكن بالحبة .. طلب ليا واحد ربعة وعرفني براسو لتبديد نظرات الاستغراب والشكّ لي كنت كنشوف فيه بيهم .. حط ليا الواقعة لي وقعت ليا مع ذيك الأم كأنها وقعت البارح، بتفاصيلها وجزئياتها وكال ليا بالأمارة: جابت ليك كازا مغلّفة فكافيط الجورنال.. إيه كاينة .. هاذيك اسي حسن بنت ختي لي كان بّاها متوفي ومّها كانت امرأة بألف رجل، ونظرا لأن وضعهم المادي (قبل ما يخدم هو فواحد الخدمة مزيانة) كان من المستحيل تكمّل قرايتها .. بفضلك - بعد الله - كملاّت قرايتها وتخرجات .. وتعرف دابا فاش خدامة؟ .. فاش؟ مديرة وكالة الحوض المائي لجهة x.. بالقدر لي فرحني الخبر .. بالقدر لي فرحت لذيك الأم لي اخيرا رأت استثمارها ينجح ويعطي ثماره .. بالقدر لي كرهت فيه كرّي أني ما درت والو فحياتي ولكن هانية .. خليتو يخلص ربعطاش بيرة باش نسّى ونضحك على راسي مع الوقت .. خلاصة هاذ النوسطالجيا حكمتان اثنتان: - ما تردّدش دير الخير راه أكيد غا تستافد منو ولو على شكل سطل بيرة فبلاصة زوينة.. - دعوات دوك لي إنت درت فيهم الخير هي الوحيدة لي ممكن تكون مُنجية ليك نهار تطيح فشي مونتيّف فيه خمسة السنيّن ديال الحبس .. وأخيراً.. رحمة الوالدين هي البديل الموضوعي والمُريح لوالديك بعد عجزك عن انصافهم مادياً.. والله المُستعان.