العبرة هي نقوليك دير الخير ورميه للبحر ..يرجع ليك

كنتي من النوع لي عندو رغبة يغير حياتو للأفضل ودار كثر من 

جهدو وكل مرة كيقول قربت نوصل كيلقى راسو عاود رجع من 

نقطة الصفر ، وهادشي كيأثر على قوة التحمل ديالو لدرجة كيجي

 واحد النهار كيمل فيه من كلشي وكيقول فنفسو مالي انا كاع على 

حالتي إلى بغات تضحك لينا هاد الدنيا مرحبا مابغابتش غير تزيد 

فالبكا. .اش ربحنا منها من زمان عيينا مانضحكو ليها وهي ديما 

مبكيانا. ..ملي سرقات منا العمر كلو لباقي كاع تفرحنا دبا 

...حيت 

الاسباب لي كنا بغينا نعيشو فيها حياتنا سعداء مشات وحنا كبرنا 

ومشات الخاطر والقلب برد من كلشي ..من الحب من الصداقة 

من الأمل وحتى من الخير لي عمرنا شفناه فالبشر ملي طحنا 

وتجرحنا تمنينا غير ذاك الشخص لي يقدر على قبلك يرجع غير

 خطوة معك اللور ويشوف مالك شنو واقع ليك .. ...ويسولك

_واش هانيا بعدا ؟

ونتا مبتاسم كتشوفيه زعما فيك النفس وداير فيها ماوقع ليك 

والو...وكتقوليه :

_غير كمل طريقك راه غير زلقت بلا مانعطلك على شغلك دبا 

نوض ...!

كيجاوبك وكيقوليك 

_ باركة يا الحمق من النفاخة زعما مارضتيش طلب مني 

نعاونك. 

.أرى يدك شد فيا راه طريقنا بديناها بجوج نكملوها بجوج حتى 

النهاية. ..!!

وماكتسمعش ليه حيت راسك قصح من حجرة 

_ واااغير سير أصاحبي دبا نتبعك .هادي غير جرحة صغيرة 

بالزربة تبرا. ..

كتلقاه هو كثر منك العناد عرفك حمق وماكيديش عليك ،،كيجي 

كيوقف ليك ورى ظهرك وكيخرج يديه من تحت دراعاتك 

وكيشدك من صدرك وكيشبك الخمسة مع الخمسة وبالخف كيجمع 

بك الوقفة. .حتى كتقطع ليه النفس وكيقوليك بالمزاح:

_تانوض الحلوف. .نتا مافيك حتى توقف وعاطيها للجبهة. 

..عرقتني أصاحبي !!

كترد عليه حتى خو مزاحو 

_ شنو هو ؟عرقتك؟ تا مالي انا قالو ليك علي انا دولبرام هههه

كيشوفيك ديك الشوفة زعما ديال مادير حسنة مايطرى باس و 

كيبغي يستاغل الفرصة حيت مابحرى حيدتي عليك ديك الغوباشة 

وطلعتي الضحيكة !

_ اااا وليت خانز اصاحبي بحال الجيفة.. خصني نترقد فشي بانيو

 ديال الصابون وجافيل شهر كامل ههه

كترد عليه بالزربة؛ 

_بغيت غير نعرف واش الناس عندها خلايا ديال العرق ....ونتا 





عندك خلايا ديال الصرف الصحي ههههههه

كيضحك معاك ساعة كتهجرو ليه ههه و كيطلع ليه الدم وكيقوليك

_ ياك السحتوت ياك ...سري يا الكلب. ..كون خليتك طايح 

مايديها 

فيك حد ....وتمشي عاوتاني تقلب فالارشيف ديال الشاب حسني 

باش تسمع ديسك ديال ( غبنوني وظلموني) ...

_ باااز زدتي حتى ظلموني. ..بغيتي تقول ليا بالفن ظلمتك يا 

الشخلول هههه 

كتشوفو فبعضياتكم وكل واحد فهم التاني شنو بغا يقول قبل 

مايتكلم. ..غير كيبركم لاخر دغيا كيفهم. .....وكضحكو فدقة 

وحدة 

كأنكم شخص واحد وكتسكتو شوية وكتبداو مسرحية الفرشة 




وشي 

يفرش شي وخى يكون مول شي هههه 

كيقوليك 

_واش عقلتي فاش كنتي مزعوط فنعيمة الشهبة و كتغني ليها 

تحت الشرجم .. طال غيابك ياغزالي راك طولتي فالغيبة. ..الخ

وكترد ليه الصرف فالبلاصة؛

_ونتا نسيتي اخويا سحيتة فاش تفارقتي مع خولة النخلة. 

..ومشيتي كاع زوقتي الحيوطة ديال درب الحومة بسميتك 




+سميتها =الحوب. ..ومدخل حرف الواو فكلمة (الحب ) باش 




تقراها بالمقلوب وتعيق بلي هاديك رسالة ماكاينش من غيرها لي 



تفهمها. ..حيت ديما كتقوليها فاش كتبي تخرج معها نتلاقاو حدا 




الحوب ..كتقصد زعما ( بوحلا) مول الكفتة وخى كدوز لحانوت 




لي حداه وكتشري ليها الزريعة هههه

كيتفرشخ بالضحك وكيقول ليك 

_ سترنا الكيدار الله يفضحك. ....عقل صغر هذاك. ..ودوزنا أيام 





زوينة لن نلقى مثلها ولو بالريق الناشفي ههه 

كتعنقو بعضياتكم وكتكملو الطريق ...بلا مايخاف شي واحد منكم 



تجرحو الحياة ولاطيحو الدنيا فهمومها. .حينت واثق عندو إنسان 





لي يجبر بخاطرو سوى صديق أو حبيب أو أخ....المهم كيحس 




بالأمان وإلى طاح كاين لي غادي يعاونو باش يوقف على رجليه. 




..ماشي غير باش يعيش حياتو. ..باش حتى هو يعاون لي وقف 




معاه. ..حتى إلى طاح تاني يلقاه موجود ...هذا هو التآزر بين 





الصحاب خاصة وبين الناس بصفة عامة ..

هادشي كامل قلتو ليك ماشي العبرة باش نقوليك. .صبر حتى تلقى 

داك الشخص لي كتمنى باش يقاسمك همومك ويضمد باهتمامو 

جرحك. ..لا اخويا لا اختي 

العبرة هي نقوليك علاش ماتكونش نتا هو ذاك الشخص لي 

كيتمناه 

أي واحد فينا ....جرب تمد يديك لشي واحد طايح ...وقفو معك 

خود بيديه باش يكمل معك الطريق. ...كون متأكد نهار الطيح هو 

لي غادي تلقى فجنبك ...دير الخير ورميه للبحر ..يرجع ليك 

يرجع ليك ..