تعرف على الطفيليات تهديد أسماك فى وسط البحر

من الحاجات المثيرة لي كاتعيشها فالحياة، ملي كاتعرف معلومة فالنت وكاتصادف معاها فالواقع، هادا واحد النوع ديال الطفليات لي لقينا منهم جوجات ففم حوتة، الاسم العلمي ديالو Cymothoa exigua, هاد الطفيليات كايدخلو في الخياشم ديال الحوتة، الانثى كاتلصق فاللسان والذكر في الخياشم وتحت من الانثى.
باش تعرف الرعب ديال هاد الطفليات بغيتك تكمل(ي) معايا هاد البوسط تال اللخر.
الرحلة ديال هاد الطفيل كاتبدا من نهار لي كايدخل للحوتة وكايكونوا 2 ولا كثر عن طريق الخياشم كيما ذكرت سلفا، و كايستقر مدة حتى يوصل مرحلة البلوغ وكايبدا ياكل من النسيج الدموي لي موجود في الخياشم، بمجرد ما يكتامل ف النمو ويكبر، وهادي لي غاتخليك تدهش، واحد منهم كايبدا يتحول لأنثى، اه الذكر كايتحول ملي كايكون عندو استعداد لذلك، ومن تما كايتحول من الخياشم وكايمشي لفم الحوتة وبالظبط لسانها وهادشي علاش كايتسمى ب "آكل لسان السمك".
الأنثى ملي كا تستاقر وتاخد بلاصتها، كاتبدا تزرع او تخشي رجليها الخلفيين في اللسان، وباش تأمن وضع الإقامة الدائم، كاتعض اللسان عضة قاسحة لدرجة كاتخلي فيه شق، وتبدا من خلال هاد الشق تمص كاع الدم لي موجود في اللسان، وبما أنها من الطفيليات اللي عندها شراهة تجاه الدم، هادشي كايخليها تستنزف اللسان بمعنى الكلمة، ونتيجة لهاد الاستغلال، اللسان كايتحلل أو كايموت وكايطيح من فم الحوتة.
عملية أكل لسان السمكة ماكتسببش فموتها، وكاتبقى حية واخا كايكون صعيب عليها، وملي اللسان كايتلاشى ومتيبقاش، ديك الساعة كاتولي تعامل مع آكل لسان السمك وكأنه لسان ديالها ونقولو كايولي عندها لسان "اصطناعي"، بهاد المعنى، لانها كتاخد بلاصة اللسان.
آكل لسان السمك، كايشد جزء كبير من مساحة فم الحوتة، وحرفيا اكبر من اللسان لي كان عندها، وهادشي كايصعب عليها تاكل مزيان، لكن مع ذلك الحوتة ماكتموتش وكاتقاتل تاخد لي قدارت عليه من الماكلة، وبطبيعة الحال أقل من السابق.
آكل لسان السمك واخد بلاصتو ففم السمكة، وكاياكل بشكل اساسي على مخاط الحوتة او عضلات اللسان، ولو فكرت أن الرعب سالا هنا، غادي نحبطك ونقولك لا، الاستقرار كاين ، الماكلة كاينة، شنو خصو، يضربها بتزويجة 😒.
للأسف، الطفيل الذكر اللي كان موجود في الخياشيم كايتحول لمكان الطفيل الأنثى اللي شد بلاصة اللسان، وكايتزاوج معاه وهادشي كولو ف فم الحوتة المسكينة 😞، بعد هادشي الطفيل الانثى كايبدا ينتج عدد من الطفيليات لي كايكونوا كلهم ذكور، وبمجرد ما الحوتة تقرب من سرب او مجموعة اخرى ديال الأسماك، كاتبدا تطلقهم باش يبداو يدخلوا ف خياشم حوتات اخرين ويكملوا دورة حياتهم المرعبة. غالبا بعد هادشي الطفيل صافي دار خدمتو وكمل مهمتو على احسن وجه وكايموت وتموت معاه الحوتة اللي مبقاش ليها حتى لسان، لا الطبيعي ولا الاصطناعي
منقول من مجموعة رجوليس