تبسيط المعارف : الشطرنج

في اطار تبسيط المعارف غنحاول نبسط الشطرنج chess. نحاول نبلي اللي عمرو مالعبو.. أما اللي كيعرف يلعب بلا مايقرا هاد التخرميزة.

أول حاجة نعرفوها هي التيران.. الرقعة Chessboard.. كتكون من 64 خانة square.. نص الخانات بلون مفتوح والنص بلون مغلوق.. ديما كيكون مربع القنت من جهتك على ليمن ديالك بلون مفتوح..

الصف الاول أفقي rank كتعمرو بالقطع المهمة pieces.. والصف الثاني كتعمرو بالبياذق pawns.

في الصف الأول بداية من اليمين كيكون الحصن أو الرخ Rook. حداه الحصان Knight .. حداه الفيل Bishop .. حداه الملك king.. حداه الوزير أو الملكة queen ..حاجة مهمة ديما الملكة كتكون في خانة بلون مفتوح. وكتكمل الصف كتحط الفيل الثاني والحصان الثاني والرخ الثاني .

وطبعا البياذق الثمانية كتحطهم في... راك عارف الصف الثاني...

ديما اللي عندو القطع البيضاء كيلعب هو الأول..

كيفاش كيتحركو القطع؟ كل قطعة عندها قيمة معينة وكتحرك بطريقة مختلفة..

أقوى قطعة هي الملكة.. ولكن علاش؟.. قبل ما يوصل الشطرنج لأوروبا كان الملك هو أقوى قطعة.. ولكن لأن الملكة ازابيلا ملكة قشتالة كانت أقوى من راجلها ملك أرغون.. زادو الصلاحيات ديال الملكة باش تولي أقوى من الملك...

الملكة كتساوي 9 ..وكتقدر تتحرك في جميع الاتجاهات افقي horizontally عمودي vertically قطري diagonally بشرط تكون الخانات خاوية من الرعايا ديالها.. ولاجا الخصم في طريقها تقدر تاكلو لبغات. كاينة غي ملكة وحدة

الملك ما عندوش قيمة حيت لتحاصر وما قدرش يهرب كيسالي الماتش.. الملك كيتحرك في جميع الاتجاهات ولكن خانة واحدة فقط.. بعكس الملك اللي ممكن تتحرك كثر من خانة. كاين غي ملك واحد الله يعطيه العافية.

الرخ Rook كيساوي 5 ..كيتحرك بشكل أفقي أو عمودي.. يعني يمينا ويسارا.. الى الخلف وإلى الأمام.

الفيل القيمة ديالو 3 .وكيتحرك قطريا diagonally كيبقا ديما في نفس اللون..كاينين جوج أفيال. واحد في لون مفتوح ولاخر في لون مغلوق.

الحصان كيساوي 3 ..كيتحرك على شكل L.. وهو الوحيد اللي عندو القدرة ينقز فوق قطعة أخرى سواء قطعة صديقة أو معادية.. كاينين جوج أحصنة.

أما البيذق الحرطاني كيساوي 1 .. منو 8 النسخ.. كيتحرك خانة وحدة إلى الأمام.. وكياكل قطريا diagonally .. ولكن ما كيرجعش للخلف ..وفاش كيكون في المكان الأولي ديالو عندو الحق يتحرك جوج خانات عموديا لبغا.. ولا وصل للصف الأخير كيضيم وكيترقى حسب الاختيار.. تقدر ترجعو ملكة أو رخ إلخ.. لكن ما يقدرش يولي مليك.. داكشي وراثي.. ويقدر يموت قبل ما يترقى باش يعيش المليك..

فاش كتاكل شي قطعة ما كتنقزش فوقها أتريكة داما.. ولكن كتهزها وتحط القطعة ديالك في بلاصتها..

فاش كتهجم على الملك.. الخصم عندو ثلاثة الحلول.. إما يحرك الملك.. إما يحط شي قطعة بين الملك وبين القطعة المهاجمة لما كانتش حصان... وإما كياكل القطعة المهاجمة.. ولا ما كانش قادر يدير شي حل كيسالي الماتش Checkmates بلونغلي أو Échec et mat بلغة الزبل.

طبعا مازال أشياء مهمة بحال " En passant" والتبييت " castling " و"stalemate. "غنخليوها من بعد باش ما نكترش عليكم.. الشطرنج راه ساهل بزاف.. غي في البدية يقدر يجيك معقد.. ولكن فاش تعلم ليه غيوليو يبانو الليك اللي ما كيعرفوش يلعبوه بحال الهومو اريكتوس.