صحتي : قرحة المعدة

قرحة المعدة ولات من الأمراض الشّائعة في الآونة الأخيرة، سواأ عند النّساء أو الرّجال، فالأصل احنا كشباب مخاصناش نكونو كنعانيو منها بتاتا حيت علميا كيتصابو بيها ناس د60 سنة ما فوق لكن راكم عارفين بحكم الروتين اليومي ديال الغذاء ديالنا المرقة ماطيشة الحريرة فيها سوق د المواد ووو و خاصة الطلبة فراه عادي نتصابو بيها.
شنو هي قرحة المَعِدة ؟! هي تمزق كيكون مُصاحبٌ للعديد من الالتهابات والقروح في الغشاء المبطن حول المَعِدة واللي الدور ديالو حمايتها، دونك ماللي كيلتهب هذاك الغشاء د المعدة فاوطوماتيكمو كتصاب بالتليّف، الشيء اللي كيزيد من إفرازات حامض الهيدروكلوريك فيها وكتولي طلع ليك الردة حامضة اولا كتحس راسك كتحرقك شي حاجة مابين الحلق و المعدة.
كاينين بزاف د الأنواع د حرقة المعدة او نقولو درجات كاينة العادية و الحادة و المزمنة، و قرحة المَعِدة غير مُعدية و ماشي سرطانيّة، لكن فبعض الحالات ممكن تنشط الخلايا السرطانية بسبابها عافانا الله و إياكم و هنا كنوليو قدام ما هو أخطر .
لهذا حاولو ما امكن غنعاود نأكد على ان شرب كاس د الما دافئ فالصباح ونخليو نصف ساعة عاد نفطرو راه مفييييد جدا لتصفية ماشي غ المعدة بل الذات كلها من اي سموم، بعدو على المأكولات اللي فيها نسبة عآلية من التوابل، بعدو من الكيتشوب كاينين شي وحدين كيحساب ليهم عصير ، العصبية الزايدة بلا فايدة، الناس اللي مدمنة على القهوة و الشاي راه كاس او جوج كافيين من هاد المشروبات نقصو شوية عفاكم، الناس اللي كتاكل الماكلة سخونة كتحرق حذآاري، والناس اللي كتاخد ادوية ومسكنات بزاف بحال دوليبران كاين شي نمادج يحرقو راسو غ شوية يمشي يبلع فانيدة د 1000 تكايسوا راه تغمض غي ربع ساعة تفيق بيخير خير ليك من داك المسكنات، بالنسبة اللي كيقدر يصوم ضربوا عصفورين بحجر اجر و ضمان صحة جيدة للمعدة.
طولت عليكم مي تذكروا ان الصحة تاج فوق رؤوس الاصحاء
 أنونيموس ماساكتينش