ليــــون تـــروتسكــــي

صنــــع الثــــورة والإنقـــلاب عليهـــﺎ.
"ليــــون تـــروتسكــــي"
الـــوجـــه الحقيقــــي للثـــــورة.
قدما كنتي إنسان معقول فأخلاقك ومبادئك الثورية قدما كثرو أعدائك لي كاتهمهوم غير مصلاحتهم وكاتهمهوم غير السلطة وغيبقاو يحفرو ليك حتى يطيحوك باش يمحيوك من طريقهم..نمشيو للموضوع.
الأسطورة الثورية "ليون تروتسكي" الاسم الحقيقي ديالو "ليف دافيدوفيتش برونشتاين" تزاد فدولة "أوكرانيا" بالضبط فمقاطعة "خريسون" عام 1879..تزاد وسط عائلة يهودية وعاش حياتو كملحد..عاش الطفولة بحالو بحال كاع الناس من بعد دخل يقرى فمدرسة "أوديسا" و"نيكولاييف" وتخرج منها على ما اعتقد فعام 1897 وفنفس الوقت غادي يتأثر بواحد المجموعة ديال الثوار السريين الشعبيين (النارودنيين) ...من بعد "تروتسكي" غادي يتعمق فالماركسية ديال "كارل ماركس" وغادي يتأثر بيها ومن تما غادي ينضم للحركة الاشتراكية وفنفس الوقت غادي يشارك فتأسيس "الاتحاد العمالي لجنوب روسيا" وهنا غايبدى "تروتسكي" يناضل ويعطيها للمظاهرات ويجر معاه آلاف العمال باش يديرو اضرابات عمالية...هادشي طبعا ماغديش يعجب النظام وغايشدوه وغايضربوه بعاماين فالحبس ومن بعد نفاوه ل"سيبيريا" لمدة 4 سنين وبدون محاكمة...
تما "تروتسكي" غادي يتلاقى واحد ختنا سميتها "ألكسندرا سوكولوفسكايا" وغيتزوج بيها وغايولد معاها وفنفس الوقت غادي يلتاحق بالاتحاد الاشتراكي الديمقراطي ف"سيبيريا" وغادي يبدل سميتو من "تروتسكي" ل"آنتيد أوتو" باش مايتورقش..ومن بعد غادي يهرب من المنفى فعام 1902 وغيتلاقى مع "لينين" وغادي يسيفطو ل"لندن" باش يتلاقى مع شي ماركسيين تما إلى جانب الأباطرة "بليخانوف" و"أكسلرود" و"مارتوف" و"بتروزوف" و"زاسوليتش" ومن تما غايدوز ل"بروكسيل" باش يشارك فالمؤتمر ديال حزب العمال الاشتراكي الروسي وتما غادة تنوض بين "البلاشفة" و"المنشفيك" وغيتقسمو وغايتفرتكو...
هنا "تروتسكي" غادي ينضم لجانب "المنشفيك" ومن بعد غايقلب عليهوم ومبقى كينتامي لا للبلاشفة ولا للمنشفيك...من بعد غادة تنوض الثورة الروسية اللولة وغايقود الحركة الاشتراكية ومجلس العمال فالثورة ولكن للأسف غادة تفشل الثورة وغادي يشدوه فعام 1907 وغادي ينفيوه تاني ل"سيبيريا" وغايمنعو عليه يدخل مزال لروسيا.."تروتسكي" غادي ينوض تاني يهرب من المنفى وغايطلع لأوروبا الغربية خاصة من بعد كتب واحد الكتاب سميتو "الثورة الدائمة" وغادي يدوز 7 سنين مع مرتو الثانية "ناتاليا سيدوفا" وفنفس الوقت غيبقى يكتب ويوجد للجديد...
فعام 1914 غادة تشعل الحرب العالمية وغادي ينوض يطلع ل"سويسرا" ومن تما ل"فرنسا" وخدم كمراسل صحفي سياسي لليبرالية الروسية وغيبدى يعارض الحرب ومن بعد غايجريو عليه من "فرنسا" وغايطلع من تما لميريكان وفعام 1917 مع اندلاع ثورة أكتوبر فروسيا غايرجع لروسيا وغاينضم للحزب البلشفي إلى جانب "لينين" ...هنا تاني غادي يتشد من طرف الحكومة الروسية المؤقتة وغادي يغبروه تاني بتهمة التجسس لصالح "ألمانيا" هادشي غادي يخلي "لينين" يتخبى ويشتاغل فالخفاء...وفنفس الوقت غادي يعقدو انصار "لينين" مؤتمرات مع انصار "تروتسكي" باش يوحدو الثورة اللينينية التروتسكية..ومن بعدما خرج "تروتسكي" بكفالة غادي ينتاخبوه العمال ديال "بتروغراد" كرئيس للمدينة ديالهم وفنفس الوقت غادي يأسس "الجيش الأحمر" وغادي يشارك بيه فالحرب الأهلية بحوالي مليون جندي أحمر...
ومن بعدما نجحات الثورة الروسية وطاحت حكومة "كرينسكي" المؤقتة غادي يشدو البلاشفة الحكم والسلطة بقيادة السفاح "ستالين" وغادي يخدم "تروتسكي" كرئيس للمجلس العسكري الثوري فجمهورية روسيا ...من بعد مدة غادي ينوض "تروتسكي" وغادي يشن حرب معارضة ضد "ستالين" وغادي يفرش البلانات ديالو خاصة تشويه الديمقراطية السوفياتية..هادشي طبعا ماغديش يعجب "ستالين" وغادي يجمع عليه رباعتو وغادي يتحالف عليه "ستالين" و"زينوفييف" و"بوخارين" و"كامينييف"...هنا "تروتسكي" غادي يستاقل من مفوضية الحرب فعام 1925 وغادي يبدى تاني يكتب وغادي يلونصي 4 ديال الكتوبة زعزع بيهم بنادم لي هوما: "الأدب والثورة" و"العهد الجديد" و"الى اين تسير بريطانيا" و"أوروبا وامريكا" وفعام 1926 غادي يتحالفو معاه دوك لي كانو ضدو "زينوفييف" و"كامنييف" هنا غادي يتاحدو مع "تروتسكي" وغادي يأسسو المعارضة الموحدة وغادي يشبكوها ضد "ستالين"...
ومن بعد عام غادي يجريو عليه من الحزب وغادي ينفيوه للمرة الثالثة من "موسكو" لآسيا ف"آلما آتا" فالحدود الروسية...علاش ؟ حيت دار العصى فالرويضة ل"ستالين" وعارض الاشتراكية ديالو والسياسية ديالو هنا ...فهاد الفترة "تروتسكي" فالمنفى غيبدى تاني يكتب شي كتوبة وغينوضو تاني يجريو عليه ل"تركيا""بالضبط جزيرة "برينبيكو" وتما غيبدى يحاول يجمع الناس لي كيأيدو الافكار الثورية ديالو والاحزاب لي تبنات الفكر التروتسكي وفنفس الوقت غيلونصي شي كتوبة بحال "تاريخ الثورة الروسية" و"حياتي" تال عام 1929 غادي يدير حملة ضد النازية وغايبدى يحدر العالم من النازيين ولكن دون جدوى...لا حياة لمن تنادي...
هنا "تروتسكي" تجاوز الحدود والحل الوحيد باش يتفك منو السفاح "ستالين" هو يصفيها ليه حيت وحل معاه..فعام 1932 غادي يمحيوه من الجنسية الروسية وغادي يقتلو الاتباع ديالو وغايقتلو بنتو وشي وحدين من عائيلتو فروسيا الشيء لي غايخلي بنتو الثانية تنتاحر...وهادشي كامل دارو "ستالين" حيت لأول مرة وقف واحد ضدو وحدهوم ليه..."تروتسكي" غادي يحاول يدخل لشحال من دولة ولكن للأسف حتى شي دولة ماقبلاتو وحتى وحدة مبغات تعطيه طلب اللجوء...من بعد غادة تراجع "فرنسا" على القرار ديالها وغاتعطيه حق اللجوء...
"تروتسكي" طبعا ماغديش يدخل ويسكت..أبدا..الثورة ملي كتشعل فشي حد عمرك ماغدي تسكتها.."تروتسكي" من بعدما دخل لفرنسا غايبدى يأسس "الأممية الرابعة" باش يوحد الاحزاب ديالو فإطار الثورة وداكشي ولكن غاينوضو يجريو عليه من فرنسا وغايطلع من تما ل"النرويج" وغادي يلونصي كتاب خر بعنوان "الثورة المعذورة"...ومن بعد عام ف1936 غادين يتشدو دوك لي كانو تحالفو معاه: "كامنييف" و"زينفييف" وغادين يتعدمو من طرف السفاح "ستالين" من بعدما اعتارفو بالخطأ وهنا غيبقى ليه العدو اللذوذ "تروتسكي" هنا غيتدخل فالخط مع الحكومة النرويجية وغادي يضغط عليهم الشيء لي غايخلي الحكومة النرويجية تبلوكي المؤلفات ديال "تروتسكي" باش مايفضحش الفساد ديال "ستالين" خاصة مايسمى ب"التصفيات الكبرى" لي دارها السفاح "ستالين"....حيت الشهيد الوحيد على الفساد ديالو هو "تروتسكي"...هنا "تروتسكي" غايخاف لا تسلمو الحكومة النرويجية ل"ستالين" وغينوض يهرب للمكسيك..
هنا غادي يفكر "ستالين" فشي قالب باش يطيح "تروتسكي" وغادي يتاهمو بلي كايوجد لشي مؤامرات باش يطيح "ستالين" والكلاب ديالو "فوروشيلوف" و"كاغانوفيتش" وبلي "تروتسكي" متحالف مع "هتلر" ومتحالف مع الامبراطور ديال اليابان باش يطيحو "ستالين" ويطيحو النظام السوفياتي...وفعام 1937 من بعدما دخل "تروتسكي" للمكسيك غادي يتحاكم فواحد المحاكمة تما كان فيها الفيلسوف الامريكي "جون ديووي" هنا غيدافع "تروتسكي" على راسو بخصوص الاتهامات لي توجهات ليه وهنا غادة تحكم عليه المحكمة بالبراءة...
هنا "تروتسكي" من بعد عام غادي يأسس "الأممية الرابعة" باش يجمع الشمل ديال الاحزاب التروتسكية فالعالم كامل وغادي يتنبأ بوقوع الحرب العالمية الثانية وغادي يعطي النتائج ديالها...هنا من بعدما فشل "ستالين" باش يصفيها ليه ويطيحو غادي يصدر حكم الإعدام غيابيا فحق "تروتسكي" بتهمة الخيانة العظمى وغايبدى تاني يصفيها لعائيلتو انتقاما منو وغايقتل جوج ولادو وغايطلعو الاتباع ديال "ستالين" لواحد سبيطار ف"باريس" كان فيه ولد "تروتسكي" وغادي يخطفوه ويقتلوه انتقاما منو وغيقتلو الاتباع ديالو واي واحد معتانق الفكر "التروتسكي" وصفاها لكاع الاتباع ديال "تروتسكي" فبزاف ديال الدول..ونظم حملة مسلحة باش يصفيها ل"تروتسكي" شخصيا ويتهنى منو بمرة وغادي يتعرض لاغتيال فاشل فالمكسيك من طرف واحد الفنان سميتو "سيكيروس"...
وفعام 1940 غادين يمشيو 20 واحد لابسين لبسة ديال البوليس وغادي يهجمو على "تروتسكي" فدارو فالمكسيك وغادي يفركعو دارو كاملة ولكن للأسف الاغتيال فشل حيت "تروتسكي" مكانش فديك الدار كان غير الكاردكور ديالو...."تروتسكي" كان كيعرف واحد ختنا سميتها "سيلفيا اغليوف" وهاد ختنا عندها واحد الصديق سميتو "فرانك جاكسون" غادة تجيبو معاها باش يتعرف على "تروتسكي" لكن للأسف مكانوش عارفين را هاد خونا عميل سوفياتي سيفطوه باش يقتل "تروتسكي" وحتى الهوية ديالو مزورة...واحد الليلة جا هاد خونا عند "تروتسكي" بحكم ولا صديق ديالو وجالسين كايهضرو من بعد دخلو لواحد المكتب غاينوض هاد خونا غيجبد واحد الفاس غايشقق بيه ل"تروتسكي" راسو وملي سمعو الحراس الصداع دخلو لقاو "تروتسكي" مجبد فلارض وشدو داك خونا فركعوه...هزو "تروتسكي" لسبيطار أملا فالحياة لكن للأسف غادي يموت من بعد نهار ديال الغيبوبة...
هنا غادين يشدو داك خونا غاينزلو عليه ب20 عام ديال الحبس اما ختنا لخرى غيطلقو سراحها من بعدما اكتاشفو بلي خونا خدعها واستغلها باش يوصل ل"تروتسكي"....هادشي لي كاين هادي هي ليسطوار ديال الاسطورة الثورية "ليون تروتسكي"...نتشاوفو مرة خرى...بيس.
بقلــم: الـﺴـــــــﺎﻋــــﺮ